shouhabiz

نهاية الاعلامية السحارة

نهاية الاعلامية السحارة

 

Gossip_media

 

الإعلامية المشعوذة
بزاف ديال الناس كايحسابليهوم باللي الأميّة هي وحدة من المشاكل الكبيرة اللي كاتواجه بلادنا. و حاليا ولينا كانسمعوا باللي مجموعة ديال المنظمات الحكومية و غير الحكومية و دور القرأن و المؤسسات التعليمية ولاو كايقدموا دروس لمحو الأمية لفائدة هادوك الناس اللي ما عمرهم مشاو المدرسة. ديزولي ولكن راكم غالطين.. المشكل الكبير اللي بسبابوا عمر بلادنا تزيد للقدام هو “الجهل”. علاش..؟ حيث يقدر يكون الواحد أمّي ماكايعرف لا يكتب ولايقرا و تلقاه مثقف و واعي و عارف بزاف ديال الحوايج (وهادشي نقدرو نلاحظوه مثلا فجدودنا اللي عمرهوم عرفوا المدرسة كي دايرا ولكن فينما جيتيهم يسكتوك). أما الجهل، راه يقدر يكون الواحد عندو إجازة، ماستر، وحتى الدوكتوراه و ماخلا فين قرا ولكن عندوا الزعلوك فالراس و تفكيروا بدائي.

السيدة على من غادي نهضروا هاد المرة هي سفيرة الجهل و الجهلاء فبلادنا… هي الفيرسيون الجديدة ديال أبو جهل.. آخر ماكاين فالسوق.. هاد السيدة وحدة من دوك اللي دخلوا للصحافة من أوسع و أكبر و أسهل الأبواب (زعما تصاحبات مع المدير ديال ديك المؤسسة الإعلامية) ودابا المشكل أنها ولات مديرة قسم بطولو و عرضو فديك المؤسسة… آي سوير. القضية كانت مفروطة بزاف لدرجة أن الناس اللي خدّامين تماك كاملين عاقوا بداكشي اللي كان واقع ولكن حتى واحد ماقدر يهضر حيت القضية داخل فيها المدير.
المهم دازت الوقت و داك المدير و مشا و جا بلاصتو واحد جديد. واحد النهار كان حارس الأمن ديال ديك المؤسسة كايقوم بجولة روتينية و هو يبان ليه الضو خارج من البيرو. دخل و هو يلقى الشمع البيض والملون مشعول و هو يطير عند الباطرون الجديد (اللي ما كايحملش صاحبتنا) و قالو آش لقى. ناضو عيطوا البوليس.. مللي جاو البوليس و شافو داكشي عيطولها باش يسولوها على ديك الفضيحة اللي دايرة فالبيرو. صاحبتنا حيت مطورة بزاف و قافزة مع راسها قالتلهوم باللي تكيفات فالبيرو و شعلات داك الشمع باش تمشي الريحة على أساس أن البوليس ديال المغرب راه كايرضعو صبعهوم… واش اللي كايجبدوا دواعشا قبل مايفكروا يديرو شي حاجة غادي تدوزيهوم نتي؟ أصلا القضية كانت مفروطة حيت لقاو سمية فلان ولد فلانة و داكشي ديال الطلاميس. السيدة كانت باغية تعطيه دقة صحيحة و تولي هي الباطرونة.
هاد القضية دارت بووووم فالصحافة الإلكترونية و على مواقع التواصل الإجتماعي و فضيحتها صارت على كل لسان.. الشيء اللي دفعها باش تقدم اتسقالتها و غبرات وجهها.
هادشي ولا كايخلع بزاف. دابا تا المدير اللول مسكين فاش دارها رئيسة قسم راه ماشي لخاطروا. بحال هادو كايخليوك تفقد الثقة فمرة و تبقى غادي وحاضي جنابك. أنا كنت شفتها مؤخرا فواحد الحفلة و قولت لصحابي حضيو ريوسكوم لا تشعلكوم شي شميعة تا نتوما ولا تضربكوم بشي تعويذة تجيبلكوم التمام. إوا شفتو الجهل كي داير؟ الحاصول الله يعفو و صافي.