إيران تعاقب الزانية بجعلها تغسل جثث

واحد المحكمة في طهران عاصمة إيران حكمة على إمرأة زانية عمرها 35 سنة ب 74 سنة سجن وسنتين في تغسيل الاموات في مكان جمع الجثت في المستشفى
خيتنا في الاول بغات تنكر ولكن منين جابو ليها الحجج والدلة إعترفت بكلشي، عندهم في إيران الزنى من أكبر الجرائم ولي حصل كايمارسها بزاف يقدر يعاقبوه بالإعدام، وهادشي بدا من 1979 منين بداو كايطبقو حد الإسلام في هذه المسألة، لحقاش في الإسلام منين كاتطبق الحد على شي مسلم إرتكب زنى أو أي شيء خارج عن الدين، بحال يلا كاتحيد عليه الذنب لي دار باش كاتدفنو وهو مقلل الذنوب ديالو
ولكن إيران راجعت هذا القرار في القانون ديالها ومابقاتش كاتقيم الحد الإسلامي في حالة الزنى ولكن العقوبات ديالها
مازالة قاصحة

كويتي لقى في الحساب ديالو 206 مليون دولار

شحال من واحد كايتمنى هادشي يوقع ليه هههه ، ولكن طلعات لواحد الكويتي، واحد النهار ماعليه مابيه، دخل للحساب البنكي ديالو لقاه عامر باللعاقة واصل ل 63 مليون و 100 آلف دينار كويتي دخلات ليه للحساب ديالو بلا مايعرف المصدر لي صيفطها
خونا في الله صور الشاشة ديال البنك فين شاف هادشي وداها للبوليس لحقاش ما فهم حتى وزة
وقال للبوليس بلي لقى بزاف ديال الفلوس في الحساب ديالو بلا مايعرف المصدر وطلب منهم يديرو التحريات ديالهم باش يعرفو المصدر ديالها لاتمشي تكون فلوس مهربة ولا ديال شي تاجر مخدرات ويصدق هو في المشاكيل
صدق من قال، الفلوس كاتخلع

طيران آخر صراع آخر، نايضة بونية في الطيارات ديال الميريكان هههه

تنشرات ڤيديو واحدة اخرى ودارت پوم ديال دباز بين المسافرين على مثن الخطوط الجوية الامريكية ( سوثويست ) لي كان غادي لكاليفورنيا. الڤيديو لي فيه 22 ثانية بانو فيه جوج رجال ماكان غير عطيني نعطيك وكايترماو فوق الكراسى والعيالات كايفرقو والو ماتفاكوش، الديريكتات ولاو غير مشيرين وجاو المسؤولين على الطيارة عاد فرقوهم
الشركة ديال الطيران قالت ان الموظفين ديالها مؤهلين باش يحبسو بحال هاد النزالات ويتدخلو بسرعة في الحالات الطبية في كل الرحلات ديال الشركة لي كاتوصل 4 آلاف رحلة



أب من سوريا ضرب بنتو حتى ماتت

بنت من سوريا سميتها دلال، عمرها 5 شهور قتلها الاب ديالها بيديه بحيث بقى كايضرب فيها حتى ماتت
مواقع التواصل الإجتماعية ديال سوريا پارطاجاو الخبر وقالو لي ماقتلوهش الجيوش بالقرطاس والقنابل كايقتلو الجنون والنفسانية المتأزمة لي ولات عند الشعب بسبب الحرب المتواصلة وعدم وجود اسباب العيش
هادشي وقع نهار 24 ابريل، الام ديال دلال حسات بلي الاب هز بنتو وباغي يتعدى عليها، مشات كاتجري عند الجيران باش يعتقوها، منين رجعات للدار لقاتو دار فعلتو ومول الامانة دا أمانتو ودلال الله يرحمها
وداتها الام ديالها مسكينة للمستشفى وتما أكدو انها ماتت بسبب تعنيف الاب ديالها لها، وجاو البوليس باش يسجلو القضية ويفتحو ملف للبحث عن الاب والإعتقال ديالو

قصة شعر اللهيب، من بعد ما إنتشرت في پاكيستان وغزة، وصلات دابا لمصر

في الأول تنشرات ڤيديو ديال حلاق باكيستاني ونتاشرات مزيآآآن ، منين صورو واحد اللقطة ديالو كايستعمل العافية باش يقاد التسريحة، وشافو واحد من غزة في فلسطين وبدا كايستعملها حتى هو للكليان ديالو، وبقات غادية حتى وصل الإنتشار ديالها لمصر
الحلاق العراقي ( حنفي ) قال للعربية انه شاف القصة الغريبة في اليوتوب منين دخل يشوف واش كاين شي جديد في ميدان الحلاقة، ولقى حلاق باكيستاني كايحسن بالعافية للناس وكايقاد بيها قصات الشعر وتعلمها وبدا كايديرها



قاصر شدوه البوليس بعدما هز عجوز عمرها 68 سنة ولاحها في المسبح

واحد المراهق صور هو وصحابو ڤيديو ديال مرا جات عندهم منين كانو مجموعين وطيحها في الارض وهزها ورماها في المسبح، هاد المرة مسكينة سميتها نانسي جيمس وفعمرها 68 سنة، كانو كايحتافلو في الدار لي حداها، مشات عندهم قالت لهم عفاكم نقصو من الموسيقى راه صدعتووونا، خونا زايغ وعاجبو راسو مشا شدها وصحابو بداو كايقولو ليه رميها فلابيسين، داكشي لي دار نيت هزها ورماها هو والكلب ديالها، وكان شي واحد كايصور الڤيديو
المهم الولد هو لي سلم راسو للبوليس وقال ليهم راني ماكنتش في الوعي ديالي، ودابا منين حسيت بالغلط ديالي كانتحمل كامل المسؤولية، البوليس مشاو عند المرا لقاوها مضروبة فكتفها وجليها بسبب لي وقع وكانت مسكينا دايرة عملية في الوركين ديالها وهو زاد كمل عليها بالفعلة ديالو
والصديقة ديالها شاي ميكنير، قالت ليهم هي اصلا ماكاتمشيش مزيان بسبب تهريسة عندها في الحوض ديالها، وراه باينة في الڤيديو ماكاتمشيش عادية، وعلاش هو زاد دار ليها هذه الحالة ؟؟
الحڭرة قبيخ آ الخوت، انا منهم نعاقبو مزيان وندير بيه درس لكل من لا يعتبر


واحد خدام في البريد كان عادي يلوح 3 آلاف رسالة

عطاهم معنى جديد لرسالة غير مرغوب فيها هههه
المهم الاخ سميتو ڤينسن هولدر، 28 سنة فالعمر ديالو، شدوه البوليس لحقاش كان كايجمع الرسائل ديال الناس وماكايوصلهاش، وعلى حساب ما قالو، خونا جمع 11 خنشة كبار عامرين بالرسائل لي مابغاش يدير خدمتو ويوصلهم للناس، و بزاف كانو مزالين فالدار ديالو فحي بروكلين
اغلبية هذه الرسائل كانو موجهين للناس ديال الحي ديالو، وشي وحدين ليه هو نيت، ومنين إستجوبوه قال ليهم مابغاش يدي الرسائل لماليهم لأسباب شخصية ومابغاش يزيد يقول شي حاجة للبوليس
المهم صحاب الحال عطاوه 5 آلاف دولار غرامة وطلقوه يمشي فحالو

واحد ضرب باه بالجنوي لحقاش نسا مادارش ليه لا صوص في الحساء ديالو

خنا في الله ( سادكين دانڭفاخون ) 36 سنة ضرب الاب ديالو لي فعمرو 65 سنة 10 ديال المرات بجنوي ديال الكوزينة ومنين الام ديالو جات تتدخل خبشها وضربها

البوليس منين جاو لقاو الولد عامر بالدم وڭالس مافاهمش شنو دار وكيف قدر يدير هكا، وكان تنشر واحد الڤيديو ديال البوليس ڭلسوه على ركابيه بالسيف عليه وقالو ليه إعتذر للجثة ديال الاب ديالك
الشاف ديال البوليس قال بلي الولد سكر بزاف وهو كايتسنى الاكل ديالو يوجد وهادشي لي خلاه يدير هذا التصرف، وقال أنهم سيفطوه للسجن وكايتسنى نهار المحاكمة ديالو، وقال بلي لقاو 10 ديال الضربات في الظهر ديال الضحية خصوصا حدا الجهة ديال الكتف اليسار ومنين سولو مراتو قالت ليهم راه ولدو لي قتلو وشدوه في الحين



رسالة خلاها مايكل جاكسون قبل الموت ديالو كايتوقع فيها شكون غادي يقتلو

المغني الأشهر عبر التاريخ، مايكل جاكسون، توقع أنه غادي يموت بجرعة زائدة سنة 2009
-13 رسالة من الرسائل ديالو كان كايقول فيها- يحاول قتلي وأنا خايف على حياتي
هذه الرسائل كشف عن وجودهم الصديق الحميم ديال مايكل جاكسون وهو رجل أعمال ألماني عمره 34 سنة إسمه ( مايكل جاكوبشاڭن ) ولي كان صديق ملك الپوپ منذ عقدين من الزمن

وحسب شهادة الصديق، قال بلي مايكل جاكسون كان كايستعد للجولة الكبيرة ديالو وطلب من صاحبو يجي عندو من ألمانيا لميريكان باش يكون معه، ومنين دار بكلامو وجا عندو، وڭلس معه 3 أيام، مايكل جاكسون عطاه رسائل كيتوقع فيها الموت ديالو
وقال ليهم أنه عمرو ما قال شكون لي باغي يقتلو وشكون كايهددو، ولكن واحد الرسالة قال فيها بلي المنظمين ديال الجولة ديالو كايضغطو عليه بزاف، وأنه خايف على حياتو
عدة أسابيع من بعد، مات مايكل جاكسون بسبب جرعة زائدة في مادة الپروپوفول ولكن صديقه قال بلي مايكل كان كايستعملو منذ أكثر من 10 سنوات لمعالجة الأرق
وبعد كل هادشي، بنت مايكل جاكسون ( پاري جاكسون ) أعلنت أنها متأكدة أن الأب ديالها قتلوه عن قصد

إحذرو الحنة السوداء، ناتاشا هاملتون تحذر من مخاطر الحنة السوداء

جمعية ديال التوعية سميتها > إحذرو الحنة السوداء < تترأسها المغنية الشهيرة ناتاشا هاملتون، كاتحذر السياح من أنهم يديرو الوشام لي كاتستعمل فيه الحنة السوداء، والسبب راجع أن بزاف ديال الناس في الشهر لي فات تحرق ليهم الجلد بسبب هذا النوع من الحناء، وتقول الجمعية أن بزاف ديال السياح الأجانب وقعو ليهم حروق ومشاكل جلدية بسبب الحنة السوداء وآخر ضحية هي بنت سميتها صوفية من بريطانيا وعمرها 22 سنة، هاد البنت يديها تحرقو بزاف من بعد ما دارت وشوم بالحنة السوداء في أغادير
الحنة كايخلطوها بمواد كادير الحساسية والحروق، ودابا صوفية مسكينة كل نهار خاصها دير ليديها اليود وتدهنهم بالكريمات المرطبة
وبسباب هادشي دارت المؤسسة الإنجليزية للجلد بشراكة مع المغنية ناطاشا هاملتون هاد الحملة التحسيسية باش يحدو من الخطر ديال بحال هذه المواد على الناس