الدار البيضاء : من بائعة الورد و السعاية لعالم الهاي كلاس

الدار البيضاء :   من بائعة الورد و السعاية لعالم الهاي كلاس

wrida

من السعاية لعالم الهاي كلاس
الفلوس كايصنعوا المعجزات. معروف علي الفلوس أن عندهوم قدرة خارقة على التغيير. تقدر تكون خـايب و ترجع زوين. تقدر تكون ماقاريش و تولي قاري كثر من الناس. تقدر تكون مذلول و ماعندك قيمة و ترجع محبوب الجماهير. هادشي تماما اللي وقع لبائعة الورد.
بائعة الورد هي واحد البنت موسخة و مكرفسة احتضناتها الزنقة من الصغر. كاتقيل تسارا بدوك الوردات ديالها و يا ويلك إلا شافتك مع شي بنت غـادي تبقى تابعاك كاترغب فيك حتى تحشم وتشري من عندها.
الظروف العائلية القاسية اللي عاشت فيهوم بائعة الورد خلاوها تخرج من المدرسة و هي صغيرة و تمتهن التسول. مرة تبيع المسكة، مرة تبيع كلينيكس، حتى انتهى بها الأمر مع الورد. و كأي وحدة فنفس ظروفها، كانوا الناس كايجريو عليها، كايعايروها و كايسبوها، وكايديولها السلعة ديالها و ما يخلصوهاش… المهم حياة البؤس و التكرفيس.
واحد النهار شافها واحد الخليجي خانز فلوس كان يالاه خارج من لا بواط و عجباتوا. البنت وخا كانت مكرفسة و موسخة كانت زوينة.. العينين زورق و الشعر زعر. المهم مشات معاه و غبرات شي 4 سنين لا حس ولا خبر.
فديك 4 سنينن فاش غبرات كانت فالخليج و تزوجات بداك السيد اللي طلع أمير خليجي و قرات و بدلات السلوك ديالها و سافرات لدول العالم.
و مؤخرا قامت بزيارة للمغرب، و رجعات لنفس البلاصة فين كانت كاتبيع الورد و كانو كايجريو عليها و يضربوها. و دابا ولاو كايبوسولها فاليدين و يقولولها “الشريفة”.. شعب ماكايمركش.
وهاد القصة هي مثال من الأمثلة الكثيرة على القدرة ديال الفلوس.. الفلوس كاتبدل.

امامة بوڭوصة تتبني جامع للعيالات فقط

امامة بوڭوصة تتبني جامع للعيالات فقط

 

 

الجوامع كاملين كايتوفروا على مكان مخصص للعيالات، اللي كايصليو مور الرجال و كايأمهم إمام راجل. بالنسبة ليكوم، وليا حتى أنا، هادشي عـادي.. ولكن بالنسبة للناس الفيمينيست المتطرفين (الشوفينيين أو السيكسييت) فهادشي هو تجسيد لعدم المساواة بين المرا و الراجل وكايمثل سيادة الجنس الذكري على الجنس الأنثوي.
شيرين خانكان، الكاتبة و السياسية المعروفة اللي مزيودة فالدانمارك من أب سوري و أم فينلندية، قررات باش دير ثورة فالإسلام بفتح مسجد نسائي مية فالمية فكوبنهاغن، الدانمارك.. المصليين، الأئمة، و حتى الناس اللي كايعتانيو بالمسجد كلهم نساء.
هاد المشروع الفيمينيست (حسب ما سماتوا) و اللي كاينبع من نظرية المساواة بين الجنسين جا كنتيجة للإحساس بالغربة و عدم الإرتياح ديال شيرين فكل مرة كاتدخل فيها لجامع رجالي (على حد تعبيرها). داكشي علاش قررات باش دير هاد الجامع النسوي، اللي غادي يكون متاح حتى للرجال اللي ماعندهوم مشكيل تصلي بيهوم مرا.
فحديثها مع وكالة الأنباء الفرنسية، قالت هاد الفقيهة على أن المشكل ديال سيطرة الجنس الذكوري هو ماشي مشكل غير ديال الإسلام، ولكم مجموعة ديال الديانات كاتعاني منو و اللي أبرزها اليهودية و المسيحيةـ اللشي اللي خلاها تتحدى هاد الواقع بفتح مسجد نسائي، سماتو ‘مسجد مريم’.
بزاف ديال الناس رحبو بهاد المبادرة، و بزاف عبروا على استيائهم تجاهها. أبرز المعارضين لهاد المشروع كان الإمام وسيم حسين، مدير المركز الإسلامي الدانماركي، اللي قال على أنه ماكاين لاش يكون جامع نسوي و أنه يقدر يشكل سبب للتفرقة بين المسلمين فالدانمارك.
فيما يخص الرأي ديالي، وباعتبار أنني فيمينيست و دايما كانادي بالمساواة بين الراجل و المرا على أساس أنهم كايشكلوا بجوج الأساس ديال المجتمع، كانقول أن هاد شيرين خانكان كاتحاول تركب على الموجة ديال الفيمينيزم وأنها اختارت طريقة خاطئة باش ديرها. و كايجيني أن الإسلام بالنسبة ليها ماشي عبادة و تقرب إلى الله بقدر ماهو محاولة إرضاء ميولاتها الإيديولوجية اللي مانقدروش نربطوهوم بالفيمينيزم، و اللي ولكن بالإحرى مرتبطين بال “سيكسيزم”. هادا رأي ديالي الشخصي، و نتوما شنو بانلكوم؟

زيرو ايصانص تقتل طفل في اغادير

زيرو ايصانص تقتل طفل في اغادير

 

scor

 

في الميريكان منين تاتوقعليق شي حاجة تتعيط ل 911 تيجيو فالبلاصة ويلا تعطلو عليك كثر من الوقت القانوني تقدر دعي البوليس ودعي لومبيلونص، هنايا الا وقعاتلك الله يستر شي حاجة خصك تنوض ودعي ربي متوقعلك تا حاجة فصحتك، حيتاش الا وقعاتلك على ماتجي توصل إن شاء الله لامبيلونص اتكون دفنووووك وقرااااو عليك سَبِّحْ.

كلشي سمع بالقصة الحزينة ديال الدري ديال 7 سنين الي عضو عقرب فناحية تامري الي قريبة لأغادير للأسف الولد كان كيلعب ماشافش العقرب الي عضو، جا باه كيجري وتيغوت عيطو لومبيلونص ديال الجماعة باش تديه لمستعجلات اغادير ولكن الي تايصوغ لامبيلونص ماقدش يتحرك لأن معندوش ليصانص فلامبولانص وحتا الأب معندوش فلوس باش يخلص ليصانص.

هادوك الي فيهوم العياقة فكازا والشمباني كومباني متيتنفسوش شوفو الناس فين عايشة مساكن.

هز الولد مشا تايجري داه للسبيطار الحومة بقا كايعاين شحاال قالولو ماكاينش غاع دوا ديال العضة ديال العقرب، مشا الأب ضبر على الفلوس هز الولد داه للمستشفى الجهوي ديال أغادير، مسكين نهارو منحوس لأن منين وصل قالولو بلي ميمكنش يدخل ولدو للمستعجلات لأن ماهازش معاه لاكارط.

الأب بدا يضرب فوجهو تامات الولد قدامو أنا كنوض بدعوة وحدة تانقول يا ربي الصحة هي كولشي لهلا يجعليك شي مشكيل ديال الصحة هنا حيتاش كتعرف راسك مشيتي، باي باي الحياة.

اللحية و النقاب تديك للحبس فالشينوا

اللحية و النقاب تديك للحبس فالشينوا

hijabkss

العالم كلو كاينادي باحترام الأديان و الثقافات ديال الشعوب و حرية ممارسة المعتقدات الدينية شريطة أنها تكون ماكاتضرش بالأمن ديال البلد ولا كاتمس بالحريات ديال ناس اخرين. و هادشي تم المصادقة عليه من طرف كل دول العالم فالحصة 36 للجمعية العامة ديال الأمم المتحدة اللي كاتهتم ببحال هاد القضايا اللي عندهوم علاقة بحقوق الإنسان. ولكن واحد البلدة فالشينوا سميتها “شينجيانغ” واقيلا ماساقوش الخبار.
اتحكم على واحد الكوبل من الأقلية المسلمة فبلدة “شينجيانغ” بالحبس، و السبب هو أن الراجل مربي اللحية و مرتو دايرا النقاب.
حسب واحد الجريدة صينية، السلطات قدمات مجموعة ديال الإنذارات للراجل باش يحيد اللحية و مرتو باش تحيد النقاب ولكن ماداوهاش فيهوم. و كنتيجة، هو اتحكم عليه ب 6 سنين ديال الحبس و هي بعاماين.
هاد الحكم جا فإطار واحد الحملة من تنظيم السلطات المحلية ديال “شينجيانغ” و اللي كاتقضي بمنع اللحية و نزع الحجاب و النقاب، وهادي تقريبا عاماين باش بداوها.
تحية لهادوك حجابي عفتي اللي معمرين لي بواط بحجابهم و دايرينو غير باش يغطيو التشعكيك و التشكريد ديال شعرهم. كن كنتو فديك البلاصة فالشينوا غايكونو عندكم جوج حلول: إما تبقاو دايرين الحجاب و يديوكوم لعكاشة ديال شينجيانغ.. ولا تصلعوا. لا لا حشومة.. حيت نتوما عزاز علي غادي نعطيكم الحل.. كاينة واحد الترطيبة زوينة سميتها “دارك آند لافلي” و رخيصة.. سيروا ديروها و خليو عليكوم الحجاب لماليه يالمشعككات..

عاجل: المتحولين و المتحولات الجنسيين المغاربة … قادوا وراقيكم مزيـــان قبل ماتفكروا تمشيو للإمارات

عاجل: المتحولين و المتحولات الجنسيين المغاربة … قادوا وراقيكم مزيـــان قبل ماتفكروا تمشيو للإمارات

chng

جيجي لورين

كاتبقى دولة الإمارات العربية المتحدة، وخصوصا دبي، وحدة من الوجهات المفضلة عند بزاف ديال المشاهير العالميين بما في ذلك ممثلين، مغنيين، عارضي أزياء، وحتى منتجين. و فنفس الوقت، كاتبقى دبي كذالك الوجهة المفضلة للمتحولين و المتحولات جنسيا. غير هو إلا كنت من المتحولين حاول (ي) اتأكد (ي) أن الصورة اللي عندك فالباسبور كاتطابق الشكل الجديد ديالك ولا الجنس اللي تحولتي ليه حيت راه ماغايخليوكش تدخل (ي) للإمارات.
هادشي تماما اللي وقع ل جيجي لورين (غريغوري آلان لازاراتو سابقا)، و اللي كاتبلغ 24 عام، فاش حاولات تدخل الإمارات قبل ما يتم منعها حيت الباسبور ديالها كايقول أنها ذكر، و الصورة ديالها كاتبين نفس الشي، عكس الهيئة ديالها اللي كاتقول أنها أنثى.
أوضح واحد المسؤول فمطار دبي الدولى أنه ماتمش منع هاد العارضة الكندية لكونها متحولة جنسيا، لكن السبب هو عدم توفرها على وثائق سليمة كاتأكد الجنس الحقيقي ديالها و المعلومات الشخصية الأخرى بحال الإسم و الصورة.
نصيحة للمتحولين و المتحولات المغاربة… قادوا وراقيكم مزيـــان قبل ماتفكروا تمشيو للإمارات.

من الألعاب الأولمبية لأجمل مؤخرة برازيلية

من الألعاب الأولمبية لأجمل مؤخرة برازيلية

ass

 

الألعاب الأولمبية ماشي بوحدها شاغلة الناس هاد الأيام, كاين واحد الحدث ديال انتخاب أجمل مؤخرة الي تايسميوها فالبرازيل ‘بام بام’.

تجوقات واحد الجوقة عالمية ديال عباد الله فريو ديجانيرو الي جاو كولهوم تيجريو باش يشوفو صاحبة أكبر وأجمل مؤخرة، وناضت الحرب مابين البنات الي كولهوم بينو المؤخرات ديالهم وناضت المنافسة بيناتهم باش يكون اختيار ديال أجمل مؤخرة لان البنات المشاركات كولهوم كاين شرط واحد قبل مايدخلو للمسابقة هي انها خصها تبرهن بانها مادارت تا عملية تجميلية وماعمرها استعملات شي مواد كيميائية.

المؤخرات العامرة بالسليكون ممنوعة من المسابقة جينيفر لوبيز وكيم كارداشيان الي عندهوم أشهر المؤخرات في العالم غيموتو بالفقصة جاتهوم المنافسة…، كل واحد وهمو شي باغي يربح ميدالية وشي باغا يربح أجمل مؤخرة.

 

فضيحة الفقيه والتيتيزة ديالو

فضيحة الفقيه والتيتيزة ديالو

Khaled_amroppp

 

التجارة أنواع… كاين اللي كايتاجر فباطاطا، كاين اللي كايتاجر فالحوايج، كاين اللي كايتاجر فالعقار و الأراضي، كاين اللي كايتاجر فالطوموبيلات، و كاين اللي كايتاجر فالدّين. و بيني و بينكوم حتى التجارة فالدين فيـها اللعاقة المزيانة و راس المال ديالها رخيص. السطارطر باك ديال هاد التجارة كايشمل: شوية ديال اللحية.. حفض شي آيات قرآنية مع شي أحاديث.. لبس فوقية و شي طريبيش وأراك للفتوى. غير هو كاين شي تجار موديرن ماكايديروش اللحية ولكن فالمقابل كايديرو قلة الحيا.
البطل ديال هاد السكوب هو واحد الداعية إسلامي موديرن من صحاب بعد العشاء إفعل ما تشاء. هاد السيد اتشهر فقناة اقرأ شحااال هادي بالبرامج الدينية ديالو و اللي عامرة موتيفيشن و كاتحرك السينسيشن، الشيء اللي خلاه يحصل على شعبية كبيرة فمصر و الدول العربية كاملة.
السي الفقيه واخد راحدتوا عالآخر هاد اليامات فالمولات و المنتجعات السياحية… و الواعرة كاع هي أنه مرونها تيتيز. الصارحة إيلا جيتو تشوفو ماخاصناش نتاقدوه. هو السيد تاجر دين معروف (كأي تاجر فمجال آخر) و دوك اللتصاور ديالوا اللخرين عايش الحياة مع ديك التيتيزة كانو خلال الكونجي ديالو، يعني خارج أوقات العمل، يعني أوف ديوتي. فوقاش نقدروا نلوموه هي فاش يبان فشي برنامج و فوسط ساعات أداؤ الواجب فشي وضعية مخلة بالأخلاق الشيء اللي عمروا ماغادي يوقع. السيد بروفيسيونيل فخدمتو بزاف. و الواعرة هي فاش سولوه المحبين ديالو في الله على هادوك التصاور قاليهوم “لا تسألوني عنها.. اسألوني عن أمور الدين”.. اللهم قوي إيمانك يا شيخ.
أصلا أصلا نتوما مافهمتوش ال

سيد. عمرو خالد راه أحسن داعية فالعالم. مسكين كاينهينا حنا على فعل المنكر باش ندخلوا للجنة و هو مسكين كايدير هاكاك حيت ماكايهموش يدخل لجهنم ولا لا بقدر ماكايهموا أن لي فان ديالو يدخلوا للجنة. واو.. سبحان من سواك أسي عمرو. إيوا الله يلعن اللي ما يحشم.. كترتوا.

توقيف محمد العمراني أشهر طبيب جراح مغربي بلندن

توقيف محمد العمراني أشهر طبيب جراح  مغربي بلندن

 

Untitled-1

 

 

محمد العمراني، 53 عام، واحد من بين أشهر أطباء جراحة القلب فبريطانيا حاليا كايواجه تهم ديال الإغتصاب، التحرش و الإعتداء الجنسي على ربعة ديال الضحايا.
الجراح ذو الأصول المغربية و اللي كايخدم فمستشفى “هارلي ستريت” تقدم للمحكمة نهار الأربعاء بتهمة الإقدام على سلسلة ديال الاعتداءات الجنسية (11 الاعتداء) آخرها فماي 2014، و حالة اغتصاب كاترجع لسنة 2001.
حسب جريدة “الدايلي ميل” البريطانية، العمراني كايشتغل بإحدى أرقى و أكبر المستشقيات فلندن، و هاد الأخير اشتهر بالمسيرة المهنية ديالو المتألقة وشارك فعشرات عمليات القلب الناجحة إلى جانب أطباء مشهورين. كما أنه أستاذ محاضر فعدة جامعات فبريطانيا.
العمراني ، اللي كايسكن فقصر فمدينة لندن القيمة ديالو 1.7 مليون باوند ( تقريبا 22 مليون درهم مغربي) اتعطالو إطلاق سراح مشروط بضمان محل الإقامة، بعد ما تم توقيفوا بصورة نهائية عن العمل و تجميد الرخصة ديالو.

الملاكم المغربي حسن سعادة يفتتح الألعاب الأولمبية بفضيحة جنسية

الملاكم المغربي حسن سعادة يفتتح الألعاب الأولمبية بفضيحة جنسية

boxee

 

كيفما عودونا الرياضيين ديالنا ديما هازين الرّاية ديال المغريب فالمسابقات الدولية. ولكن كاينة واحد الفئة منهم فينما مشاو كايطيحوا بالدرابو و كايشوهونا.
الرأي العام الدولي مازال ما نسى الفضيحة ديال مدير فريق كرة القدم المغربي فالسويد وناض واحد البوكسور مغربي مشارك فالألعاب الأولمبية فالبرازيل كمل لينا اللي خاص.
البوليس ديال البرازيل القى القبض على حسن سعدة، البوكسور المغربي اللي عندو 22 عام، اليوم فالبرازيل قبل 14 ساعة على انطلاق الألعاب الأولمبية بريو دي جانيرو و السبب هو أنه تهجم على جوج عاملات نظافة فمقر الإقامة اللي مخصص للمشاركين و حاول يعتدي عليهوم جنسيا قل ما يتم التوقبف ديالو و اصدر قرار باحتجازوا لمدة 15 اليوم.
هادشي راه بزاف. هاد الكبت مابغاش يتفهملي كاع.. واش بنادم كايحسابلوا السيبة فالعالم غي كايخرج المغرب كايحسابلوا أي بنت دازت من حداه يقدر يحط عليها يديه و يقيس فيها. الله يعفو.

نفلا عن موقع francetvsport.fr

حتى التبرڭيڭ تايقتل

حتى التبرڭيڭ تايقتل

 

mnzah

 

التبركيك فالمغريب شي حاجة اللي جاري بيها العمل. الناس عندنا ماعمرهوم ما سمعوا بشي حاجة سميتها احترام الخصوصيات و دايما كايبغيو يدخلوا راسهوم فشي حوايج اللي ماشي سوقهوم. و دابا المشكل كون غي كانت بالفايدة. و مع المغاربة نيتهم زوينة بزاف تبارك الله وعزيز عليهوم الاستنتاجات ديال المحقق كونان.. يقدرو يصيفطوك للحبس؛ وفبعض الأحيان للقبر غي بهاد التركيك و النية الناقصة ديالهوم.
القضية ديال اليوم هزات جميع مواقع التواصل الاجتماعي. القصة بدات فاش واحد ولد الباك عرض على صاحبتوا لدارهوم اللي كاتواجد فإقامة المنزه 6 فمراكش. ناضت واحد العقروشة من صحابات الحال اللي هضرنا عليهم فاللول و شافت الدري و البنت داخلين للشقة.. وحيت هي دايرا خدمتها على حقها وطريقها كانت عارفة باللي مالين دارهوم ما كاينينش و استنتجات باللي الولد ناوي يدير شي فضيحة. بلاصت ما تدق عليه و تحاول تهضر معاه و تنصحو باش يدير عقلوا، ناضت لالاهوم سدات عليهوم الباب من برا بالساروت (حيت نساوه لاصق برا) و عيطات للبوليس. الدري مسكين تخلع وخاف من الشوهة. و دابا حتى كن ماكانش عوال يدير شي حاجة التهمة لاصقة عليه و بلا مانعاودليكم على الشوهة اللي ممكن توقع للدري والبنت و نتوما عارفين المغاربة كي كايموتوا على الفضايح. الدري ضرب هاد الحسابات كاملين فراسو و قرر باش يغامر بحياتو باش مايوقعش هادشي. خرج للبالكون و حاول يتدلا لبرا باش يخرج و يحل الباب ولكن المسكين طاح ومات فبلاصتو.
الناس كايتكريساو و كايتسرقو فديورهم كل نهار و ماكاينش اللي يعاونك باش تعرف الشفارا، ولكن فبحال هاد البلانات المغاربا حاضرين. بحال الى تقولو المنكر فالمغريب محصور غي فالعلاقات الغرامية بين دري و بنت. كايغمضو عينيهم على المنكر ديال الرشاوي اللي كايدور كل نهار فالمقاطعات و الإدارات، المنكر ديال البيستون و عدم تكافؤ الفراص فالولوج للمدارس و الخدمة، المنكر ديار الراجل اللي كايعطي قتلة لمرتو و كايصيفط ولادو يخدمو ولا يسعاو بلاصت مايصيفطهوم للمدرسة… و اللائحة طويلة بزاف. أنا متأكد أن هاد المرة عمرها تسامح راسها.. وحتى الى ساحات راسها العائلة ديال الولد و لا المغاربة كاملين عمرهوم يسامحوها.
كانتمنا هاد القصة تكون درس و الناس ياخدو العبرة نخدمو عقلنا فبحال هاد الحالات.