واحد البوقوصة بطلة أخطر سيلفي فالعالم

واحد البوقوصة بطلة أخطر سيلفي فالعالم

 


bogo selfie
 

كاين اللي كايتسلق توبقال و كايحسابلوا راه طفروا.. كاين اللي كايدير تريب لمرزوكة و كايجيبليه الله راسوا بحال ابن بطوطة.. و كاين اللي كايمشي يتسارا العالم و كايتسلق اعلى ناطحات السحاب و البروج فالمدن العالمية الكبرى.. و تلقاه عادي جدا..
نشرات واحد الروسية عندها 23 عام سيلفيات ديالها و هي فوق اعلى نقطة فناطحات السحاب و فالسدود ديال مجموعة ديال المدن حول العالم.

هاد البنت الروسية معروفة فالمواقع الاجتماعية بالمغامرات الخطيرة اللي كادير و اللي ماشي اي واحد يقدر يديرهوم..
الصراحة كل واحد وهمو.. حنا عندنا فاتي فلوغات مقابلين غي الخاوي و كايقتلوك فالفايسبوك بديك “انا أميرة.. الأميرات ماكايخدموش” … وا نتي نوضي ضربي الفقد فراسك و شوفي الناس آش كايديروا.

الفقيه اللي تسنينا براكتوا… دخل البحر و حيد جلابتو هو و عشيقتو..

الفقيه اللي تسنينا براكتوا… دخل البحر و حيد جلابتو هو و عشيقتو..

 

fkiha

 

اليوم كون جالس كانشرب قهيوة فالسان سيت فلوس أنجلوس حتى وصلني ميساج من عند واحد الصديق ديالي صحفي أمريكي كايقول ليا باللي الفضيحة ديال الفقيه و الفقيهة وصلت بلاد العم سام.. و تنشرات فجريدة النيويوك تايمز.
النسخة المغربية ديال “السیکس أون ذا بيتش” خلقات الحدث و فضيحتنا بقت بجلاجل (خلاوها خوتنا المصريين).
السيدة طالقاها على البنات فالخطب و المحاضرات و كاتقوليهوم باللي النظرة ديالهوم للجنس الآخر كاتعتبر زنا.. جالسة فالبحر كاتمثل الجزء الثاني ديال التيتانيك.
وديك الساعة منين طلع ليهوم الما للعنين وقرروا يدخلو الشيطان بيناتهوم، يمشيو بعدا يكريو شي برتوش.. هوما تبارك الله مامخصوصينش. جالسين كايتزاحموا مع و لاد الشعب و المراهقين على البحر..
الحاصول.. الله ينعل اللي مايحشم. شوهتونا و شوهتوا الإسلام.

قملة ب 35 درهم فالإمارات.. آش هادا؟

قملة ب 35 درهم فالإمارات.. آش هادا؟

 

unnamed unnamed (1)

 

قملة ب 35 درهم فالإمارات.. آش هادا؟
كول نهار كانفيقو على خبار فشكل.. ولكن هاد الخبار فشكااااااال.
واحد من اسوء الكوابيس اللي تقدر تجي لشي واحد بالليل هو يجيه القمل للراس.. ولكن واش فخباركوم أنه كاينين شي ناس كايتمناو يجيهوم؟ و ماشي غي هادشي.. هاد الناس مستعدين باش يخلصو حتى ل 35 درهم فالقملة الواحدة. أييييه.. عارف.. فعلا كايصعاب التعليق فهاد اللحظات.
كثر الطلب فدولة الإمارات الشقيقة فاليامات الأخيرة على القمل من طرف العيالات.. و السبب هو انهم اكتاشفوا القدرة العجيبة ديالو فالمساعدة على نمو و وتكثيف الشعر. ايه.. داك القمل اللي كايخلع الناس فالامارات عندو شان و قيمة.
و كنتيجة لتزايد الطلب عليه.. ناضوا مجموعة ديال الصالونات فأبو ظبي و دبي كايربيوه و كايبيعوه ب 35 درهم للوحدة و الناس كاتشري.. 35 درهم أعباد الله.. يعني القملة كتر من الدولار.. الأورو.. الجنيه الإسترليني.. الين و زيد او زيد..
هادشي هادا دفع السلطات الإماراتية لفرض غرامات مالية كاتوصل ل 2000 درهم اماراتي على الصالونات و محلات التجميل اللي كاتاجر فالقمل.
بالنسبة للتجار المغاربة والشركات اللي كادير الاستيراد و التصدير.. هادي هي الفرصة ديالكوم.. القمل عطاه الله فالمغرب.. و عاد القمل ديال المغرب معروف بالجودة ديالو. يعني تقدرو تطلبو حتى ل 45 ولا 50 درهم اللوحدة.. ياللاه باليو بالمارشي ماحد الطلب مرتفع.

لوبتيسيان و الشفار لمكسطر

لوبتيسيان و الشفار لمكسطر

 

xx

هادي واحد لوبتيسان معروفة فواحد الحي راقي فالكازا. جات واحد النهار فالصباح بكري قبل قبل ماتبدا الخدمة كاتجمع و تقاد وهو يدخل عليها واحد الولد بوقوص و لابس كوستيم والنضاضر و مقاد الحالة قالها وريني النضاضر و بدات كاتوريه و عطاتو وقت و كبرات بيه. السيد بدا كايقيس غي ف لي مارك الواعرين ها جورج أرماني ها كاريرا. المهم عجبوه وهو يقووليها ديزولي راني نسيت بزطامي فالطوموبيل غادي نجيبو و نرجع حيت هادشي عندك عجبني.
فاش مشا هو ناضت كاتقلب على البورطابل ديالها مالقاتوش.. هزات الفيكس وصونات على نمرتها و هو يجاوبها صاحبنا. قالتلوا كيفاش زعما نتا باين ولد عائلة وضارب الحطة و مكسطر و طمعتيلي فبورطابل؟ قاليها علاش نتي فاش كاتبغي تمشي الخدمة كاتمشي مبهدلة؟ السيدة مالقات ماتقول ولكن هادي تديرلها العقل.
حنا المغاربة واحد من العيوب اللي فينا هو أننا كانموتوا على المظاهر و الزواق كايضربنا على الشعا.. دابا كون جاها واحد مالابش مزيان- وتكون تحتو اللعاقة المزيانة و باغي يشري- كون ماعطاتوش وقت و قيمة بحال اللي دارت مع الشفار. قالوها سيادنا اللوالا: “يا المكسي من برا شحالك من لداخل”.

الفيس كيني ديال الشينوا

الفيس كيني ديال الشينوا

bik

 

فالوقت اللي مازال فيه المغرب و بعض الدول العربية كايهضروا على ترخيص ولا منع العومان ب “البيكيني” و “المايو” .. الشينوا ناضو دارو بيكيني من نوع آخر و اللي الوظيفة ديالو ماشي يغطى المناطق السفلي من الجسم، ولكن كايغطي غير الوجه. المهم تخطى غير الوجه و تجي فينما بغات.
هاد المايو ديال لوجه اتطلق عليه إسم “فايس كيني”، و الوضيفة ديالو هي تعويض الكريمات و الزيوت اللي ماكايخليوش الشمس تشد فالوجه.
الفايس-كيني كايتباع فالشواطئ الصينية ب 25 ين ( تقريبا 35 درهم مغربية) و فيه بالزاف ديال اللوانات و الزواقات.
آش بانلكوم فهاد البلان؟ تقدروا تلبسو الفايس-كيني؟

من مضيفة الطيران لمليارديرة للحبس

من مضيفة الطيران لمليارديرة للحبس

hindh

 

قصة مغربية طموحة: من عالم الطيران، لعالم الأعمال، لعالم الإجرام و الحبس.

فاش كانهضروا على الحلم الأمريكي، غالبا ما كانهضرو على ناس اللي قدرو يبداو من الزيرو و يشقو طريقهم نحو القمة بكل ثبات. هاد الناس اللي قدروا يحققو “الأميريكان دريم” هوما أشخاص غير عاديين بالمرة. ماشي حيت عندهوم قوى خارقة ولا شي حاجة.. ولكن حيت هوما فهمو الحياة كيدايرة، خدموا عقلهوم و رسمو خطة لحياتهوم اللي خلاتهم يحققو هاد النجاح اللي هوما فيه حاليا.
هـ.ع ، هي وحدة من المغاربة اللي قدرو يحققو نجاح واسع فالعالم العربي. وبالرغم من أن الطرق اللي خدات باش تحقق الأهداف ديالها كايولدو مجموعة ديال لتساؤلات، هادشي ماكايعنيش أنها ماخدماتش بذكاء باش توصل لداكشي اللي وصلاتلو.
هـ.ع بدات المسيرة ديالها كمضيفة طيران، بعد ما خدات الديبلوم ديالها من مدرسة خاصة لمضيفي و مضيفات الطيران. أول خدمة بدات كانت فشركات طيران خليجية اللي خلاتها تلاقا مع ناس مهمين فالخليج و اللي غادي يلعبو دور مهم فمراحل أخرى فحياتها.
هـ.ع، اللي كاتننمي لعائلة بسيطة، استطعات بفضل الذكاء و الجاذبية ديالها سنة 2000 باش تولى مضيفة خاصة فطائرة ولي عهد خليجي آنذاك عبد الله بن عبد العزيز. من مور هادشي دخلات فعلاقات مع مجموعة ديال الموظفين الساميين و رجال أعمال خليجيين اللي من بينهم خ.ت و أ.أ. هاد الأخير اللي غادي تزوج بيه فسنة 2007 و غادي تطلب منو الطلاق فنفس السنة حيت السيد كان مورط فشي خواض.
أخير تزويجة، و اللي نقدرو نقولوا على أنها السباب فصعود هـ.ع للقمة و نزولها تحت سابع أرض فنفس الوقت كانت مع سفير دولة عربية فالامم المتحدة م.ص.م . السيد عاون هـ.ع باش تفتح شركة طيران خاصة بيها ف 2008، و ف 2010 غدي تحل شركة ثانية سميتها للطيران، و اللي كاتعامل مع مشاهير و أبرز شخصيات العالم العربي.
هـ.ع حاليا فالحبس و السبب هو الخيانة الزوجية، بعد ما تورطات فعلاقة غير شرعية مع رجل الأعمال المغربي م. ك. ب. راجلها بدا كايشك باللي كاتلعب موراه، الشيء اللي خلاه يدير تحاليل ديال الحمض النووي اللي غادي يبينلو أن البنات اللي عندو معاها ماشي بناتو و هادا كان السبب الوجيه اللي خلاه يبلغ عليها.
الطموح اللامحدود ديال هـ.ع خلاها توقع فأخطاء كلفاتها الحرية ديالها. بزاف ديال الناس اللي كانو مقربين منها و نقدرو نقولو أنهم كانو كاليلحسولها الكابة قلبو عليها بسباب هادشي. أنا كانعرف هـ.ع شخصيا و تلاقيت معاها ماشي مرة ماشي جوج و نقدر نقول على أنها سيدة راقية و لبقة و كاتعامل مزيال. و لكن الأخطاء اللي ارتاكبات هي أخطاء لا تغتفر و خصوصا فالعالم العربي، و ها هي حاليا كاتدفع الثمن ديالها.

العياقة والسليت فالكباريهات

العياقة والسليت فالكباريهات

 

bnatsh

 

كلشي بدا تيهضر فكازا على دوك الجوج بنات الي جاو دخلوا لواحد الكاباري معرووف عيطو للسرباي قالولو بغينا قرعة كبيرة… من بعد ما جابها بقاو كيشطحوا ويردحوا كلشي شافهم بقاو يتصورو والسلفيات مشاو عند المغني وقالولو دكر سمياتنا وكيما كنعرفوا خصك تغرم للمغني باش يديرها و قالولو هي ديرها هاحنا انغرموا عليك.

وبقا يدكر السميات اهلا وسهلا بالأنسة فلانة و الأنسة فلانة حيحوا مزياااان دارو الشو كلشي شافهم معا هما كانو جالسات حدا المنصة والفضيحة شوية مشاو للطواليط جلسوا فيها 15 دقيقة فاش كانوا ايخرجوا ناضت خرجات اللولة خرجات الثانية دردبو مشاو للباركينڭ تبعهوم السيكيريتي قاليهوم ساينو را مخلصتوش القرعة رضوهوم جبدوا لاكارط اللولة باش يخلوصوا جبدو الثانية تا كارطة ماخدامة من بعد رجعوا للطوموبيل من بعد مالقاو تاحل لقاو الحل اللخر والوحيد خداو ليهم التيليفونات مرهونين علا مايجيبو ليهم الفلوس.

الدار البيضاء : من بائعة الورد و السعاية لعالم الهاي كلاس

الدار البيضاء :   من بائعة الورد و السعاية لعالم الهاي كلاس

wrida

من السعاية لعالم الهاي كلاس
الفلوس كايصنعوا المعجزات. معروف علي الفلوس أن عندهوم قدرة خارقة على التغيير. تقدر تكون خـايب و ترجع زوين. تقدر تكون ماقاريش و تولي قاري كثر من الناس. تقدر تكون مذلول و ماعندك قيمة و ترجع محبوب الجماهير. هادشي تماما اللي وقع لبائعة الورد.
بائعة الورد هي واحد البنت موسخة و مكرفسة احتضناتها الزنقة من الصغر. كاتقيل تسارا بدوك الوردات ديالها و يا ويلك إلا شافتك مع شي بنت غـادي تبقى تابعاك كاترغب فيك حتى تحشم وتشري من عندها.
الظروف العائلية القاسية اللي عاشت فيهوم بائعة الورد خلاوها تخرج من المدرسة و هي صغيرة و تمتهن التسول. مرة تبيع المسكة، مرة تبيع كلينيكس، حتى انتهى بها الأمر مع الورد. و كأي وحدة فنفس ظروفها، كانوا الناس كايجريو عليها، كايعايروها و كايسبوها، وكايديولها السلعة ديالها و ما يخلصوهاش… المهم حياة البؤس و التكرفيس.
واحد النهار شافها واحد الخليجي خانز فلوس كان يالاه خارج من لا بواط و عجباتوا. البنت وخا كانت مكرفسة و موسخة كانت زوينة.. العينين زورق و الشعر زعر. المهم مشات معاه و غبرات شي 4 سنين لا حس ولا خبر.
فديك 4 سنينن فاش غبرات كانت فالخليج و تزوجات بداك السيد اللي طلع أمير خليجي و قرات و بدلات السلوك ديالها و سافرات لدول العالم.
و مؤخرا قامت بزيارة للمغرب، و رجعات لنفس البلاصة فين كانت كاتبيع الورد و كانو كايجريو عليها و يضربوها. و دابا ولاو كايبوسولها فاليدين و يقولولها “الشريفة”.. شعب ماكايمركش.
وهاد القصة هي مثال من الأمثلة الكثيرة على القدرة ديال الفلوس.. الفلوس كاتبدل.

امامة بوڭوصة تتبني جامع للعيالات فقط

امامة بوڭوصة تتبني جامع للعيالات فقط

 

 

الجوامع كاملين كايتوفروا على مكان مخصص للعيالات، اللي كايصليو مور الرجال و كايأمهم إمام راجل. بالنسبة ليكوم، وليا حتى أنا، هادشي عـادي.. ولكن بالنسبة للناس الفيمينيست المتطرفين (الشوفينيين أو السيكسييت) فهادشي هو تجسيد لعدم المساواة بين المرا و الراجل وكايمثل سيادة الجنس الذكري على الجنس الأنثوي.
شيرين خانكان، الكاتبة و السياسية المعروفة اللي مزيودة فالدانمارك من أب سوري و أم فينلندية، قررات باش دير ثورة فالإسلام بفتح مسجد نسائي مية فالمية فكوبنهاغن، الدانمارك.. المصليين، الأئمة، و حتى الناس اللي كايعتانيو بالمسجد كلهم نساء.
هاد المشروع الفيمينيست (حسب ما سماتوا) و اللي كاينبع من نظرية المساواة بين الجنسين جا كنتيجة للإحساس بالغربة و عدم الإرتياح ديال شيرين فكل مرة كاتدخل فيها لجامع رجالي (على حد تعبيرها). داكشي علاش قررات باش دير هاد الجامع النسوي، اللي غادي يكون متاح حتى للرجال اللي ماعندهوم مشكيل تصلي بيهوم مرا.
فحديثها مع وكالة الأنباء الفرنسية، قالت هاد الفقيهة على أن المشكل ديال سيطرة الجنس الذكوري هو ماشي مشكل غير ديال الإسلام، ولكم مجموعة ديال الديانات كاتعاني منو و اللي أبرزها اليهودية و المسيحيةـ اللشي اللي خلاها تتحدى هاد الواقع بفتح مسجد نسائي، سماتو ‘مسجد مريم’.
بزاف ديال الناس رحبو بهاد المبادرة، و بزاف عبروا على استيائهم تجاهها. أبرز المعارضين لهاد المشروع كان الإمام وسيم حسين، مدير المركز الإسلامي الدانماركي، اللي قال على أنه ماكاين لاش يكون جامع نسوي و أنه يقدر يشكل سبب للتفرقة بين المسلمين فالدانمارك.
فيما يخص الرأي ديالي، وباعتبار أنني فيمينيست و دايما كانادي بالمساواة بين الراجل و المرا على أساس أنهم كايشكلوا بجوج الأساس ديال المجتمع، كانقول أن هاد شيرين خانكان كاتحاول تركب على الموجة ديال الفيمينيزم وأنها اختارت طريقة خاطئة باش ديرها. و كايجيني أن الإسلام بالنسبة ليها ماشي عبادة و تقرب إلى الله بقدر ماهو محاولة إرضاء ميولاتها الإيديولوجية اللي مانقدروش نربطوهوم بالفيمينيزم، و اللي ولكن بالإحرى مرتبطين بال “سيكسيزم”. هادا رأي ديالي الشخصي، و نتوما شنو بانلكوم؟

زيرو ايصانص تقتل طفل في اغادير

زيرو ايصانص تقتل طفل في اغادير

 

scor

 

في الميريكان منين تاتوقعليق شي حاجة تتعيط ل 911 تيجيو فالبلاصة ويلا تعطلو عليك كثر من الوقت القانوني تقدر دعي البوليس ودعي لومبيلونص، هنايا الا وقعاتلك الله يستر شي حاجة خصك تنوض ودعي ربي متوقعلك تا حاجة فصحتك، حيتاش الا وقعاتلك على ماتجي توصل إن شاء الله لامبيلونص اتكون دفنووووك وقرااااو عليك سَبِّحْ.

كلشي سمع بالقصة الحزينة ديال الدري ديال 7 سنين الي عضو عقرب فناحية تامري الي قريبة لأغادير للأسف الولد كان كيلعب ماشافش العقرب الي عضو، جا باه كيجري وتيغوت عيطو لومبيلونص ديال الجماعة باش تديه لمستعجلات اغادير ولكن الي تايصوغ لامبيلونص ماقدش يتحرك لأن معندوش ليصانص فلامبولانص وحتا الأب معندوش فلوس باش يخلص ليصانص.

هادوك الي فيهوم العياقة فكازا والشمباني كومباني متيتنفسوش شوفو الناس فين عايشة مساكن.

هز الولد مشا تايجري داه للسبيطار الحومة بقا كايعاين شحاال قالولو ماكاينش غاع دوا ديال العضة ديال العقرب، مشا الأب ضبر على الفلوس هز الولد داه للمستشفى الجهوي ديال أغادير، مسكين نهارو منحوس لأن منين وصل قالولو بلي ميمكنش يدخل ولدو للمستعجلات لأن ماهازش معاه لاكارط.

الأب بدا يضرب فوجهو تامات الولد قدامو أنا كنوض بدعوة وحدة تانقول يا ربي الصحة هي كولشي لهلا يجعليك شي مشكيل ديال الصحة هنا حيتاش كتعرف راسك مشيتي، باي باي الحياة.