واحد ضرب باه بالجنوي لحقاش نسا مادارش ليه لا صوص في الحساء ديالو

خنا في الله ( سادكين دانڭفاخون ) 36 سنة ضرب الاب ديالو لي فعمرو 65 سنة 10 ديال المرات بجنوي ديال الكوزينة ومنين الام ديالو جات تتدخل خبشها وضربها

البوليس منين جاو لقاو الولد عامر بالدم وڭالس مافاهمش شنو دار وكيف قدر يدير هكا، وكان تنشر واحد الڤيديو ديال البوليس ڭلسوه على ركابيه بالسيف عليه وقالو ليه إعتذر للجثة ديال الاب ديالك
الشاف ديال البوليس قال بلي الولد سكر بزاف وهو كايتسنى الاكل ديالو يوجد وهادشي لي خلاه يدير هذا التصرف، وقال أنهم سيفطوه للسجن وكايتسنى نهار المحاكمة ديالو، وقال بلي لقاو 10 ديال الضربات في الظهر ديال الضحية خصوصا حدا الجهة ديال الكتف اليسار ومنين سولو مراتو قالت ليهم راه ولدو لي قتلو وشدوه في الحين



رسالة خلاها مايكل جاكسون قبل الموت ديالو كايتوقع فيها شكون غادي يقتلو

المغني الأشهر عبر التاريخ، مايكل جاكسون، توقع أنه غادي يموت بجرعة زائدة سنة 2009
-13 رسالة من الرسائل ديالو كان كايقول فيها- يحاول قتلي وأنا خايف على حياتي
هذه الرسائل كشف عن وجودهم الصديق الحميم ديال مايكل جاكسون وهو رجل أعمال ألماني عمره 34 سنة إسمه ( مايكل جاكوبشاڭن ) ولي كان صديق ملك الپوپ منذ عقدين من الزمن

وحسب شهادة الصديق، قال بلي مايكل جاكسون كان كايستعد للجولة الكبيرة ديالو وطلب من صاحبو يجي عندو من ألمانيا لميريكان باش يكون معه، ومنين دار بكلامو وجا عندو، وڭلس معه 3 أيام، مايكل جاكسون عطاه رسائل كيتوقع فيها الموت ديالو
وقال ليهم أنه عمرو ما قال شكون لي باغي يقتلو وشكون كايهددو، ولكن واحد الرسالة قال فيها بلي المنظمين ديال الجولة ديالو كايضغطو عليه بزاف، وأنه خايف على حياتو
عدة أسابيع من بعد، مات مايكل جاكسون بسبب جرعة زائدة في مادة الپروپوفول ولكن صديقه قال بلي مايكل كان كايستعملو منذ أكثر من 10 سنوات لمعالجة الأرق
وبعد كل هادشي، بنت مايكل جاكسون ( پاري جاكسون ) أعلنت أنها متأكدة أن الأب ديالها قتلوه عن قصد

إحذرو الحنة السوداء، ناتاشا هاملتون تحذر من مخاطر الحنة السوداء

جمعية ديال التوعية سميتها > إحذرو الحنة السوداء < تترأسها المغنية الشهيرة ناتاشا هاملتون، كاتحذر السياح من أنهم يديرو الوشام لي كاتستعمل فيه الحنة السوداء، والسبب راجع أن بزاف ديال الناس في الشهر لي فات تحرق ليهم الجلد بسبب هذا النوع من الحناء، وتقول الجمعية أن بزاف ديال السياح الأجانب وقعو ليهم حروق ومشاكل جلدية بسبب الحنة السوداء وآخر ضحية هي بنت سميتها صوفية من بريطانيا وعمرها 22 سنة، هاد البنت يديها تحرقو بزاف من بعد ما دارت وشوم بالحنة السوداء في أغادير
الحنة كايخلطوها بمواد كادير الحساسية والحروق، ودابا صوفية مسكينة كل نهار خاصها دير ليديها اليود وتدهنهم بالكريمات المرطبة
وبسباب هادشي دارت المؤسسة الإنجليزية للجلد بشراكة مع المغنية ناطاشا هاملتون هاد الحملة التحسيسية باش يحدو من الخطر ديال بحال هذه المواد على الناس

أب قال لبنتو أنه كايعتابرها ماتت منين مشات مع صاحبها أسود لحفل

قال لها سافي سالينا ما نحضر لتخرج ديالك مانحلص لك المدرسة ديالك، منين تزوجتي راجل كحل الله يهنيك بيه كانعتابرك مايتة، وهي قالت ليه مالك عنصري بزاف ؟ انا مشيت مع الصديق ديالي للحفل وهذا أمري عادي والعنصرية ما خاصهاش تكون
وزاد تعصب هو وقالها الرجل الاسود ما كانعتابروش بنادم
آنا واليديها تفارقو منين كانت صغيرة وعاشت مع ماماها، وعلاقتها بالوالد ديالها ماقوياش بزاف، وقالت ليه انا كانموت على الصديق ديالي ومستعدة نموت على قبللو
التصويرة ديال المحادثة تنشرات في مواقع التواصل الإجتماعي وشافوها بزاف ديال الناس بشكل مهول، وماعجبهومش الحال وكل واحد شنو قال ولكن كلشي ضد التصرف المشين ديال الوالد ديال البنت، لي قالو عليه عنصري وماصالحش للتعايش معاه، ولكن هي قالت بلي هي نشرات الصورة ليس لغرض إلا أنها بغات تقول للناس راحنا في 2017 والعنصرية مازالت تعشش في قلوب بزاف ديال
الناس بحال الاب ديالها

الزواج من غرباء ينتج عنه صعوبة في ممارسة الجنس

الزواج من اول نظرة كايكون فيه ممارسة الجنس كايتحكم فيها غير العقل ماشي الحب والجوارح والعشق المتبادل
كودي قال انه ودانييل تزوجو وهوما ماكايعرفوش بعضهم من قبل، وهذا السبب خلاهم ماكايماسوش الجنس مع بعضهم، والحاجة الوحيدة لي كاتشركهم فوق الفراش هي النوم لا غير، وقالت الزوجة انها بحال يلا ناعسة حدا واحد ميت ماكاين لا مشاعر لا والو بيانتهم

كوپل آخر سميتهم شايلا ونات عندهم نفس المشكل وكاتحس الزوجة ان حالة الجمود بيناتهم سببها الزواج من رجل غريب وبلي هادشي يقدر يطول بزاف وتولي ماهي مزوجة ما هي مطلقة، الراجل بارد من جيهتها وهي كذلك

لحسن الحظ كاين شي و حدين كاتصدق ليهم بحال آشلي وآنتوني لي تزوجو بنفس الطريقة ولكن لقاو التجاوب بيناتهم والحب وعايشين بيخير


اب وبنتو قتلو جارتهم بعدما فرڭعات ليهم كرة قدم جابوها ليها في الجردة

كيلي ماشين تهرسو ليها الضلوع بعدما دفعها جارها ويليام جيلي فوق طاولة وبدا كايضرب فيها للوجه لعام لي فات
وهادشي كامل لحقاش ولاد بنتو ناطالي بولين، تجلات ليهم الكرة في الجردة ديال كيلي وفرڭعاتها ليهم
المرا مسكينة داوها للسبيطار ولكن بقات كاتعاني من نزيف داخلي حتى ماتت فدارها سيمانة بعد الحادث

وبسبب موتها البنت والاب ديالها ولاو متهمين من طرف محاكم مدينة ليستر بالقتل العمد، وفي المحاكمة قالو بلي هي لي جبداتهم وهما غير دافعو على راسهم ولكن حتى واحد ماكان ناوي يقتلها وماعرفوش بلي الامور تقدر تتطور لهادشي
ولكن القاضي قال بلي بولين سيفطات رسالة لصاحبها قالت ليه بلي راها ضربات جارتها وهرسات ليها الضلوع من بعد ما فرڭعات الكرة ديال ولادها وفي الرسائل لي بيناتهم كان باين انهم باغينها تموت

ولكن دابا الحمد لله الاب وبنتو شدوهم وغادي يتحاكمو في يونيو، باش يرجع الحق ديال عائلة الضحية لماليه
الله يستر

موظف في إيلترا شين تحكم فراسي خلال هجوم مسلح

تاكر ماري نائب المدير ديال مطعم جيمي جونس في مدينة كانساس ولا مشهور بزاف بعدما تعامل مع شفار بكل برودة دم
الڤيديو كاتبين بان شرطي سميتو تيري رايفورد دخل للمطعم وطلب الماكلة والفلوس وجبد الفردي دارو ل تارك ماري في وجهو، ولكن هادشي كلو لم يحرك له تاكر ماري ساكنا وبقا معهن مع راسو وبان مبآآآارد في الڤيديو وقال من بعد للصحافة انه ماكانش خايف ڭاع وبلي الشفار غير محترف وحس بيه مبتدأ، وكايستغرب كيفاش انه مجرم قديم وعندو سوابق



متزلج في الما تساطح مع السمك الطائر وضربوه في مناطقه الحساسة

واحد المتزلج ياباني سميتو ميروكي تصور منين كان كايدير السكي في البحر وطارت سمكة طائرة وضرباتو في مناطق جسمه الحساسة بين رجليه
ميروكي دار تعليق في التويتر باليابانية وغوغل ديال الترجمة ما دارش خدمتو مزيان وترجمها مبدلة شويا وقال بلسان ميروكي ( السمة ضرباتني ديريكت في حجري 
مئة فالمية أصلا ديك الترجمة ديال غوغل عمرها ماكانت صحيحة 
ميروكي وخا الحريق قدر يكمل المسابقة ديالو وماطاحش من السكي وقت الإصطدام، والمتابعين ديالو صايبو صورة متحركة باش يشرحو فيها شنو وقع

 

الكنيسة العالمية للحشيش كاتستعد باش تفتح

كايقولو بلي الهدف من الكنيسة هو يتجمعو الناس ويرتاحو فيها ويخويو قلبهم باش يحسنو من وضعهم النفسي ويوليو ناس مزيانين، وبغاو يزيدو الحشيش لانها كاتهدأ بنادم، ولكن قالك هادشي خاص يدخلو فيه فكاهيين وفنانين وموسيقيين، ولكن سكان المدينة خافو ان مالين الفكرة يستغلو الكنيسة غير باش يروجو الحشيش ولكن قالو ليهم مالين الكنيسة بلي بيع الحشيش ممنوع في الكنيسة ولي بغا يكمي يجيبها معه هو

وقالو بلي التخشع هو انك تنسى الذات وتشعر بالروح عن طريق الحشيش وأضاف انه تربى فديانة فيها الناس كايتصرعو ويطيحو في الارض، ولهذا يلا كانو كايعتابروهم متدينين، يعني حتى بالحشيش خاص يتعتابرو متدينين اكثر 
وقال الشريك الآخر بلي الروحانية لي يعطيها لك الحشيش ماكاتنسيكش في الإعتقاد ديالك الديني ولكن كاتدعمو وكاتخليك تحس بيه
هذه الكنيسة داروها فبناية عمرها 113 سنة في حي واشنطن پارك والسقف ديالها فيه اشكال هندسية ملونة

بعض إناث اليعسوب كايديرو راسهم مايتين باش مايقربوش ليهم الذكور

واحد الباحث لقا شي إناث ديال اليعسوب كايديرو بحال شي نساء منين كايتلاقاو مع رجال ماكايعجبوهمش، كايديرو راسهم ميتين هههه
الباحث راسم خليفة من جامعة زوريخ، قال انه مشا لسويسرا يجيب الدود ديال اليعسوب لي كايدير ليه الدراسة، ولاحظ انثى يعسوب هربانة وذكر تابعها، ونزلات للارض ونعسات على الظهر ديالها ومنين وصل عليها الذكر يسحاب ليه ماتت ومشا فحالو عاد رجعات طارت، وقال انه عمرو شاف هاد الظاهرة من قبل وكايظهر ان هذه القضية كايديروها بزاف ديال الإناث

ونشر الباحث خليفة هذه الدراسة وقال انه وجد 27 انثى من أصل 31 دارو راسهم ميتين بنفس الطريقة، وكيعتقد ان هذا راجع لكون الذكور عندهم جهاز التناسل كايخوي الجهاز التناسلي ديال الأنثى من الحيوانات النوية ديال الذكر لي قبل منو باش هو لي يخصبها، ولكن الأنثى منين كاتحس بلي الجهاز التناسلي ديالها فيه مني كافي لتخصيب كل البيض كادير راسها ميتة باش مايضيعش ليها الذكر الثاني كلشي

ولكن هذا الشي ماعندناش نحن البشر، يوا علاش شي عيالات كايديرو بحال إناث اليعسوب ؟؟ ههه
فهم تسطى